PDA

View Full Version : ننگے پِنڈے چاننی گئی بَگانے پِنڈ



زیرک
08-03-2012, 11:57 PM
ننگے پِنڈے چاننی گئی بَگانے پِنڈ
عاشق بھکھے سوں گئے رات پرانے پِنڈ
کِکّر دے گَل لگ کے آکھے جنڈ کریر
کَلّم کَلّے رہ گئے ایس نمانے پِنڈ
ہولی ہولی شہر نے مٹی لئے خرید
وِکدے وِکدے وِک گئے آنے آنے پِنڈ
مُنڈیاں کُڑیاں پا لئے بنگلے شہر لہور
ماں پئیو موت اُڈیکدے نمو جھانے پِنڈ
ناں کوئی آنڈھ گوانڈھ اے تے نہ کوئی سجّن ساک
تُوں وسنیک ایں شہر دا تُوں کی جانے پِنڈ
پِنڈوں آوے پیار دی نِمّی نِمّی وَا
وَسدِیاں رِہن حویلیاں تے موجاں مانے پِنڈ
نِگھّی، نرم، نویکلی پِنڈاں دی پرتیت
سُفنے دے وِچ جا وڑاں آنے بہانے پِنڈ
کچّے پکّے شہر دی وِنگی ٹیڈھی سوچ
ویندیاں ویندیاں آ وڑی زور تگھانے پِنڈ
تینوں ٹھرّک پلاٹ دا، سانوں ویل زمین
تیری روزی شہر وِچ تے ساڈے دانے پِنڈ
کندھاں دے گَل لگ کے کوٹھے دیسی ڈھا
جے مضطرؔ نُوں لے گئیوں اَج پرانے پِنڈ

چوہدری محمد علی مضطرؔ