PDA

View Full Version : جہاں خوف کے سائے پھیلے ہیں



سقراط
01-26-2014, 08:31 PM
عتیق احمد عزمی (http://www.express.pk/author/349/ateeq-ahmed-azmi/)

http://express.pk/wp-content/uploads/2014/01/221047-snackisland-1390688602-851-640x480.JPG


برازیل کا اسنیک آئی لینڈ اپنے دنیا بھر کے سیاحوں کے لئے جنت شمار کیا جاتا ہے

ہر انسان کی خواہش ہوتی ہے کہ وہ دنیا میں گھومے پھرے اور نت نئے مقام دیکھے یا پھر ان مقامات پر جائے جہاں لطف اندوز ہونے کے خوب مواقع میسر ہوں اور عموماً سیاح حضرات ایسی ہی جگہوں پر جانا پسند کرتے ہیں، لیکن کچھ ایسے خواتین اور حضرات بھی ہوتے ہیں جو زیادہ تر ان مقامات پر جانا پسند کرتے ہیں۔جہاں قدم قدم پر پراسراریت کے بادل چھائے ہوں، حالاں کہ جان جوکھم میں ڈال کر ان علاقوں کی سیر کرنا یا انہیں دریافت کرنا ہر ایک کے بس کی بات نہیں ہے۔ تاہم یہ بلند حوصلہ لوگ اپنی جان کی پرواہ کیے بغیر ان پراسرار اور اجنبی علاقوں میں جانے سے گریز نہیں کرتے۔


http://i888.photobucket.com/albums/ac89/etwebdesk/etwebdesk001/10_zpsd64a22a6.jpg

اس مضمون میں ایسے ہی کچھ اہم مقامات کے بارے میں معلومات فراہم کی گئی ہیں، جن کے گرد کسی نہ کسی حوالے سے دل دہلانے والی کہانیاں، انجانے خوف، پے درپے پیش آنے والے پراسرار حادثات اور انوکھے حالات اور واقعات کی چادر تنی ہوئی ہے۔

٭اسنیک آئی لینڈ
Snake Island

برازیل کی ریاست سائو پالو برازیل کی معیشت میں ریڑھ کی ہڈی کی مانند ہے تو دوسری جانب اپنے منفرد لینڈ اسکیپ کے باعث دنیا بھر کے سیاحوں کے لیے جنت شمار کی جاتی ہے۔


http://i888.photobucket.com/albums/ac89/etwebdesk/etwebdesk001/11_zpsce76930e.jpg

طویل ساحلی پٹی کی حامل اس ریاست سے تیس کلومیٹر کی دوری پر سمندر میں ’’سانپ جزیرہ‘‘ واقع ہے، جسے انگریزی زبان میں اسنیک آئی لینڈ اور مقامی زبان میں ’’ایلہا ڈی کوئیمیڈا گرانڈ ‘‘ کہا جاتا ہے۔ یہ جزیرہ زہریلے سانپوں کی کثرت کے باعث عوام کے لیے ممنوع مقام ہے۔ اس جزیرے میں سانپوں کی انتہائی زہریلی قسم ’’فرڈی لانس‘‘ کی کثرت ہے۔ چار لاکھ تیس ہزار مربع میٹر پر محیط اس جزیرے میں ’’گولڈن لانس ہیڈ‘‘ کے نام سے بھی معروف ان زہریلے سانپوں کی تعداد کا اندازہ اس بات سے لگایا جاسکتا ہے کہ ہر مربع میٹر رقبے پر کم ازکم تین یا چار سانپ موجود ہیں۔

http://i888.photobucket.com/albums/ac89/etwebdesk/etwebdesk001/12_zps5e7e115e.jpg

پرندوں کو بطور غذا استعمال کرتے ہوئے عرصۂ دراز سے پلنے والے ان سانپوں کی مجموعی تعداد کے حوالے سے مختلف آراء پائی جاتی ہیں۔ تاہم محتاط اندازے کے مطابق جزیرے پر پانچ سے سات ہزار سانپ ہر وقت پھنکارتے رہتے ہیں۔

http://i888.photobucket.com/albums/ac89/etwebdesk/etwebdesk001/13_zpsbd6d9727.jpg

واضح رہے کہ یہ جزیرہ پہاڑی پر مشتمل ہے اور اس کا کوئی ہموار ساحل نہیں ہے، لہٰذا یہاں اگر کوئی اپنے قدم رکھنے کی کوشش کرتا ہے تو اس کا استقبال پہاڑی کے ساتھ درختوں پر لٹکتے ہوئے دو سے تین فٹ طوالت کے سانپ کرتے ہیں۔ اس وقت اس جزیرے میں برازیلین بحریہ کا ایک غیرآباد لائٹ ہائوس ہے جو عرصۂ دراز سے اپنے رکھوالے کا منتظر ہے۔

٭اوکیگھارا جنگل
Aokigahara Forest

سرسراتی سرد ہوائیں، تاریکی میں ڈوبے کیچڑ میں ایستادہ ہیبت ناک درخت اور ان سے ٹکراتی ہوائوں سے پیدا ہونے والی چیخ نما صدائوں کا مسکن ’’اوکیگھارا جنگل‘‘ دہشت کی علامت بن چکا ہے، کیوں کہ جاپان کے تاریخی پہاڑ فیجی کے شمال مغرب میں واقع یہ تاریک جنگل ان گنت لاشوں کا بھی مسکن ہے۔


http://i888.photobucket.com/albums/ac89/etwebdesk/etwebdesk001/16_zpscac010a2.jpg

دل چسپ بات یہ ہے کہ یہ جنگل قبرستان بھی نہیں ہے تو پھر یہاں لاشوں کا کیا کام دراصل ضلع ’’یاما ناشی‘‘ کے کنارے پنتیس مربع کلومیٹر پر پھیلا ہوا یہ اوکیگھارا جنگل جاپانیوں کے لیے خودکشی کا سب سے پسندیدہ مرکز ہے، جہاں اکثروبیشتر درختوں سے پھندا لگی جھولتی لاشیں نظر آتی ہیں یا پھر جنگل کے پر سکوت ماحول میں فائر کی آواز موت کی علامت بن کر بین کرتی ہے۔

http://i888.photobucket.com/albums/ac89/etwebdesk/etwebdesk001/14_zps28d9f0d0.jpg

واضح رہے کہ جاپان میں خودکشیوں کا تناسب دنیا کے کسی بھی ملک سے زیادہ ہے یوں تو جاپان میں مذہبی بنیاد پر رضاکارانہ خودکشی کا سلسلہ عرصۂ دراز سے جاری ہے، جسے ’’ہاراکاری‘‘ کہا جاتا ہے۔ تاہم گذشتہ کئی دہائیوں سے خودکشی کی وجوہات میںاکیلا پن، گھریلو ناچاقی، معاشی بدحالی اور قرضوں کی عدم ادائیگی شامل ہے۔

http://i888.photobucket.com/albums/ac89/etwebdesk/etwebdesk001/15_zpsc3496101.jpg

اوکیگھارا جنگل میں خودکشیوں کے بڑھتے ہوئے رجحان کو روکنے کے لیے انتظامیہ کی جانب سے انگریزی اور جاپانی زبان میں تنبیہی کتبے بھی لگائے گئے ہیں۔ تاہم اعدادوشمار کے مطابق سن انیس سو اٹھاسی سے اب تک یہاں سالانہ اوسطاً سو سے زاید افراد موت کو گلے لگاتے ہیں اور یہ رجحان جاپان کے مالی سال کے اختتام پر مارچ کے مہینے میں عروج پر ہوتا ہے۔ ’’درختوں کا سمندر‘‘ کے نام سے بھی معروف اس جنگل کا موت میں رنگا ہوا ماحول جس میں لاشوں کی بدبو اور قدموں تلے چرمراتی انسانی ہڈیوں کی آواز واضح محسوس کی جاسکتی ہے، کم زور دل حضرات کے لیے طبعی موت کا باعث بھی بن سکتا ہے۔ یہی وجہ ہے کہ بیشتر سیاح اوکیگھارا جنگل کو دور سے ہی دیکھنے پر اکتفا کرتے ہیں۔

٭گڑیوں کا جزیرہ
Isla de las Munecas

شمالی امریکا میں واقع ملک میکسیکو اپنی متنوع ثقافت اور تاریخ کے حوالے سے مشہور و معروف ہے۔ میکسیکو کے دارالحکومت کا نام بھی ’’میکسیکو سٹی‘‘ ہی ہے۔


http://i888.photobucket.com/albums/ac89/etwebdesk/etwebdesk001/17_zpsb4bcbcc4.jpg

یہ عظیم الشان شہر انتظامی طور پر سولہ حصوں میں منقسم ہے جس میں سے ایک ’’زو کچی ملکو‘‘ (Xochimilco)ہے۔ میکسیکو شہر کے جنوب میں اٹھائیس کلومیٹر کی دور پر واقع زوکچی ملکو کا بیشتر حصہ نہروں پر مشتمل ہے۔ ماضی میں ان نہروں کے درمیان کاشت کاری کی غرض سے بنائے گئے مٹی کے وسیع ٹیلے آج بھی موجود ہیں، جو ان نہروں کے درمیان جزیروں کے مانند نظر آتے ہیں۔ ان ہی خشکی کے ٹکڑوں میں سے ایک ٹکڑے کا نام مقامی افراد نے ’’گڑیوں کا جزیرہ‘‘ رکھا ہوا ہے۔

http://i888.photobucket.com/albums/ac89/etwebdesk/etwebdesk001/18_zpsb3da191b.jpg

یہ چھوٹا سا مگر ہمورا سطح کا ٹیلا ’’ٹی شیلو‘‘ نہر کے درمیان واقع ہے، سربریدہ بدن، ہاتھ پیر کٹی ہوئی یا پھر آنکھوں سے محروم سیکڑوں بوسیدہ گڑیوں سے سجے یا اٹے ہوئے اس جزیرے کی وجہ تسمیہ بیان کرتے ہوئے مقامی باشندوں کا کہنا ہے کہ آج سے تقریباً پچاس برس قبل یہاں پر ایک ننھی بچی پراسرار حالات میں ڈوب کر مرگئی تھی اور عین اس جگہ سے جہاں وہ بچی ڈوبی تھی جزیرے کے رکھوالے ’’ڈان جیولین سانتانا بریرا‘‘ کو ایک گڑیا پانی پر بہتی ہوئی ملی تھی، جسے اس نے نکال کر درخت سے ٹانگ دیا تھا۔ کچھ دنوں بعد وہاں سے کشتی میں گزرنے والے کچھ افراد نے محسوس کیا کہ گڑیا انہیں دیکھ کر نہ صرف ہاتھ ہلاتی ہے بلکہ منہ سے بھی کچھ کہتی ہے۔

http://i888.photobucket.com/albums/ac89/etwebdesk/etwebdesk001/19_zps2139b70a.jpg

اس واقعے کے مشہور ہوتے ہی جزیرہ ایک پراسرار حیثیت اختیار کرگیا۔ دوسری جانب جزیرے کے رکھوالے ڈان جیولین سانتانا بریرانے محسوس کیا کہ اسے کوئی ماورائی قوت مزید گڑیائیں لانے اور انہیں درختوں پر لٹکانے کا حکم دے رہی ہیں۔ چناںچہ اس نے اس حکم پر عمل شروع کردیا اور آج جزیرے کے تمام درخت اس کی لٹکائی ہوئی گڑیوں سے بھرے ہوئے نظر آتے ہیں۔

http://i888.photobucket.com/albums/ac89/etwebdesk/etwebdesk001/20_zpse4197ca7.jpg

لڑکی کے ڈوبنے کے پچاس سال بعد حیرت انگیز طور پر سن دوہزار ایک میں عین اسی مقام جہاں لڑکی ڈوبی تھی ڈان جیولین سانتانا بریرا بھی پراسرار طور پر ڈوب کر ہلاک ہوگیا۔ اس واقعے نے جزیرے کو مزید پراسرار بنادیا اور آج صرف باہمت سیاح ہی خشکی کے اس ٹکڑے پر قدم رکھتے ہیں ۔

http://i888.photobucket.com/albums/ac89/etwebdesk/etwebdesk001/35_zps1d24d3d8.jpg

جن میں سے کچھ سیاحوں نے پرانی، بوسیدہ اور گھورتی ہوئی آنکھوں والی ان گڑیوں میں اپنی لائی ہوئی گڑیائیں بھی لٹکادی ہیں۔ تاہم اس حقیقت سے کوئی انکار نہیں کرسکتا کہ شام کا اندھیرا پھیلتے ہی درختوں کی خشک شاخوں اور کھردرے تنوں سے لٹکی ہوئی بے ضرر گڑیائوں کی گھورتی ہوئی آنکھیں جزیرے کے قریب سے کشتیوں میں گزرنے والوں کو تیز تیز چپو چلانے پر مجبور کردیتی ہیں۔

سقراط
01-26-2014, 08:32 PM
٭دی اورٹن پل
The Overtoun Bridge

اسکاٹ لینڈ کی کائونٹی ڈنبرٹن میں ایک چھوٹا سا پرسکون اور سرسبز گائوں ملٹن ہے یہ گائوں مشہور عمارت ’’اوورٹن ہائوس ‘‘ کے قرب میں واقع ہے اور اوورٹن ہائوس اسٹیٹ کا حصہ ہے ۔اس اوورٹن اسٹیٹ گیسٹ ہائوس کے قریب سے دریائے ’’کلیڈ ‘‘ گزرتا ہے ۔


http://i888.photobucket.com/albums/ac89/etwebdesk/etwebdesk001/21_zpsa7e1dd0c.jpg

جس سے نکلنے والی ایک نہر کے اوپر اٹھارہ سو پچانوے میں تعمیر کیا گیا ایک معمولی سا خمیدہ پل ہے۔

http://i888.photobucket.com/albums/ac89/etwebdesk/etwebdesk001/22_zpse31ad168.jpg

اس پل کے نیچے نہایت کم مقدار میں پانی بہتا ہے جب کہ نہر کا فرش سخت چٹانی پتھروں اور جھاڑ جھنکاڑ سے اٹا ہوا ہے۔

http://i888.photobucket.com/albums/ac89/etwebdesk/etwebdesk001/23_zps6a87e985.jpg

سن انیس سو پچاس کی دہائی میں یہ پل اس وقت پراسرار حیثیت اختیار کرگیا۔ جب مقامی افراد نے محسوس کیا کہ اس پل سے بہت سے کتے کود کر اپنی جان دے رہے ہیں اور ان کے اس عمل کی بظاہر کوئی وجہ بھی سامنے نہیں آرہی۔ واضح رہے کہ نہر میں مچھلیاں بھی نہیں ہوتیں جا ن دینے یا دوسرے لفظوں میں خودکشی کرنے والے یہ کتے عموماً لمبی تھوتھنی والے ’’لبیراڈوری‘‘ نسل سے تعلق رکھتے تھے کتوں کی یہ نسل زبردست قوت شامہ رکھتی ہے اور تیر بھی سکتی ہے۔

http://i888.photobucket.com/albums/ac89/etwebdesk/etwebdesk001/24_zps96cbf1d8.jpg

خودکشی کے حوالے سے یہ بھی مشاہدہ کیا گیا ہے کہ کتے جس وقت خود کشی کرتے ہیں۔ اس وقت ہمیشہ موسم خوش گوار اور تیز چمک دار دھوپ نکلی ہوتی ہے ایک اور حیرت انگیز بات یہ بھی سامنے آئی کہ بہت سے کتے پچاس فٹ کی بلندی سے کودنے کے بعد مرنے سے بچ گئے تو وہ تیر کر دوبارہ پل پر آئے اور دوسری کوشش میں جان کی بازی ہار گئے۔

http://i888.photobucket.com/albums/ac89/etwebdesk/etwebdesk001/25_zps06c0c55d.jpg

خودکشی کے عمل کا ایک اور پراسرار پہلو یہ بھی ہے کہ مرنے والے تمام کتوں نے اوورٹن ہائوس کی جانب سے آتے ہوئے پل کی دائیں جانب کی دیوار سے نہر میں کودکر خودکشی کی ہے۔اس حوالے سے مقامی افراد کا کہنا ہے کہ سن انیس سو چورانوے میں پل سے ایک شخص نے اپنی کم عمر بچی کو پھینک کر ماردیا تھا اور خود بھی خودکشی کرنے کی کوشش کی تھی خود کشی میں ناکامی کے بعد اس نے پولیس کو بیان دیا تھا کہ پل کے نزدیک واقع اوورٹن ہائوس آسیب زدہ ہے اور اسے ایسا کرنے کی ہدایت اوورٹن ہائوس سے آنی والی ایک آواز نے دی تھی۔

http://i888.photobucket.com/albums/ac89/etwebdesk/etwebdesk001/26_zps7ebce711.jpg

واضح رہے کہ ’’کیون موائے‘‘ نام کے اس شخص نے یہ عمل عین اس مقام پر انجام دیا تھا، جہاں سے کتے نہر میں چھلانگ لگا کر خودکشی کرتے ہیں پچاس سال میں لگ بھگ چھے سو سے زائد کتوں کی پراسرار انداز میں خودکشی کے عمل نے ’’اوورٹن پل‘‘ کو انسانوں کے لیے بھی خوف کی علامت بنادیا ہے۔ یہی وجہ ہے کہ پل پر سے گزرنے والے ہر شخص کو اپنی ریڑھ کی ہڈی میں عجیب سی سنسناہٹ محسوس ہوتی ہے۔

٭ہوآیا بیکیو جنگل
Hoia Baciu Forest

وسطی اور جنوب مشرقی یورپ کے سنگم پر واقع ملک رومانیہ خوب صورت پہاڑوں، سرسبز قطعہ اراضی، جھیلوں اور جنگلات پر مشتمل ہے۔


http://i888.photobucket.com/albums/ac89/etwebdesk/etwebdesk001/27_zps25a0c260.jpg

رومانیہ کے مرکزی حصے میں تاریخی خطہ ٹرانسلوانیا واقع ہے، جس کے پہاڑ خون آشام بلائوں کی آماج گاہ ہونے کے حوالے سے مشہور ہیں۔ واضح رہے خوف اور دہشت کی علامت ڈریکولا کے کردار کے خالق ’’برام اسٹوکر‘‘ نے ڈریکولا کا مسکن بھی انہی پہاڑوں میں ظاہر کیا ہے۔ دوسری جانب اسی پراسرار خطے میں واقع شہر ’’کلج نکوپا‘‘ اپنے ایک ایسے پراسرار جنگل کی وجہ سے شہرت رکھتا ہے، جس کے بارے میں مقامی افراد کا خیال ہے کہ یہ جنگل خلائی باسیوں کا زمین پر رابطہ کا مرکز ہے۔

http://i888.photobucket.com/albums/ac89/etwebdesk/etwebdesk001/28_zpsef6b2b3a.jpg

جنگل کا نام ’’ہوآیا بیکیو‘‘ نامی اس چرواہے کی یاد میں رکھا گیا ہے جس کے بارے میں خیال کیا جاتا ہے کہ وہ اس گھنے اور تاریک جنگل میں اپنی دو سو بھیڑوں کے ساتھ غائب ہوگیا تھا اور کبھی واپس نہیں آیا تاہم جنگل اس وقت عالمی سطح پر خبروں کی زینت بنا تھا جب اٹھارہ اگست انیس سو اڑسٹھ کو ایک ملٹری ٹیکنیشن ’’امل بارنیا‘‘ نے کام کے دوران حادثاتی طور پر جنگل کے عین اوپر ایک ایسی عجیب و غریب شے کی تصویر اتاری تھی جسے بعد میں تمام حلقوں کی جانب سے نامعلوم اڑن طشتری قرار دیا گیا تھا۔ اسی طرح سن انیس سو ساٹھ ہی کی دہائی اور سن انیس سو ستر کی دہائی میں بھی یہاں پر مقامی افراد نے اڑن طشتریوں کی نقل وحمل کا مشاہدہ کیا تھا۔
اس عرصے میں ماہر حیاتیات ’’الیگزنڈر اسٹف ‘‘ کی کھینچی ہوئی تصاویر بھی نہایت اہمیت کی حامل ہیں۔ خلائی مخلوق کے موجودگی کے علاوہ جنگل کے دوسرے پراسرار اور ناقابل یقین پہلوئوں میں سے ایک جنگل میں داخل ہونے والو ں کا مختلف بیماریوں میں مبتلا ہونا یا جنگل کے قریب سے گزرتے ہوئے مسافروں کو یہ محسوس ہونا کہ جنگل میں سے کوئی مستقل انہیں دیکھ رہا ہے یا روشنیوں کے ہیولے ان کا تعاقب کررہے ہیں۔ اس کے علاوہ جنگل کے بعض حصوں میں موجود درختوں کے تنوں اور شاخوں کا انتہائی عجیب وغریب انداز کی وضع وقطع یا شکلوں میں مڑا ہوا ہونا شامل ہے۔

http://i888.photobucket.com/albums/ac89/etwebdesk/etwebdesk001/29_zps114540b1.jpg

اس کے علاوہ جنگل میں بہت سی ایسی بھی جگہیں ہیں جہاں ان عجیب وغریب تنوں والے درختوں میں گھری دائرے کی شکل میں صرف زمین نظر آتی ہے اور جب بھی اس زمین پر کچھ اگانے کی کوشش کی گئی تو وہاں کچھ بھی کاشت نہیں ہوسکا، حالاں کہ مٹی کے تجزیوں نے ثابت کیا ہے کہ یہاں کی مٹی ہر لحاظ سے قابل کاشت ہے۔

http://i888.photobucket.com/albums/ac89/etwebdesk/etwebdesk001/30_zps242a3525.jpg

اس کے علاوہ کچھ انتہائی اہم اور اپنی نوعیت کے منفردواقعات میں ایسا بھی ہوا ہے کہ جب کوئی شخص جنگل میں داخل ہونے کے بعد اس کے چند مخصوص حصوں میں پہنچا تو اسے اپنے ماضی کے واقعات لمحہ بہ لمحہ یاد آنا شروع ہوگئے اور وہ جیسے ہی اس حصے سے نکلا تو واقعات کا تسلسل ٹوٹ گیا، بل کہ اس دوران اس کے پاس موجود برقی آلات نے بھی غیرمتوقع انداز کے نتائج دینے شروع کردیے۔
غالباً یہی وجہ ہے کہ کئی موقر رسالوں، ٹی وی کے ریالٹی شوز اور بی بی سی جیسے نشریاتی اداروں کی جانب سے دوسو پچاس ہیکٹر پر پھیلے ہوئے ’’ہو آیا ہیکیو جنگل‘‘ پر پیش کی جانے والی تفصیلات اور پروگراموں میں اسے رومانیہ کا ’’بر مودا ٹرائی اینگل‘‘ کے نام سے بھی لکھا اور پکارا جاتا ہے۔

٭تیرتے پتھر
Sailing Stones

امریکا کی ریاستوں کیلی فورنیا اور نواڈا میں پھیلی ہوئی ’’موت کی وادی‘‘ اپنے پراسرار ماحول اور انوکھے واقعات کے باعث دنیا بھر میں منفرد مقام رکھتی ہے شمالی امریکہ کے سب سے خشک اور گرم مقام کا درجہ رکھنے والی یہ وادی لگ بھگ پونے چونتیس لاکھ ایکڑ رقبے پر محیط ہے۔


http://i888.photobucket.com/albums/ac89/etwebdesk/etwebdesk001/a_zpsf55d2b26.jpg

اس بنجر وبیابان وادی کے شمال مغرب میں ایک علاقہ ’’دی ریس ٹریک‘‘ کے نام سے مشہور ہے اس مقام پر ماضی میں کبھی جھیل ہوا کرتی تھی جو اب خشک ہوچکی ہے۔

http://i888.photobucket.com/albums/ac89/etwebdesk/etwebdesk001/b_zps46096d5d.jpg

اس جھیل کی چٹخی ہوئی خشک سطح پر موجود گھسٹتے اور لڑھکتے پتھر اور ان سے بننے والے نشان ابھی تک عام انسانوں اور سائنس دانوں کے لیے درد سر بنے ہوئے ہیں۔ اپنے مخصوص راستوں پر ہر دو سے تین سال بعد انتہائی معمولی فاصلے پر گھسٹنے والے یہ پتھر بغیر کسی امدادی قوت کے یہ عمل انجام دیتے ہیں۔

http://i888.photobucket.com/albums/ac89/etwebdesk/etwebdesk001/c_zps3dd72bed.jpg

چند گرام سے سیکڑوں کلوگرام وزن کے ان منفرد پتھروں کے اس عمل کے پیچھے کون سی قوت کار فرما ہے۔ یہ بات ابھی تک طشت ازبام نہیں ہوسکی ہے۔ اس حوالے سے نہ صرف سائنس داں حیرت میں گم ہیں بل کہ روحانیت اور اسی طرح کے دیگر شعبوں سے تعلق رکھنے والے ماہرین بھی لاعلم ہیں۔

http://i888.photobucket.com/albums/ac89/etwebdesk/etwebdesk001/d_zps439d2e54.jpg

وادی میں وقوع پذیر ہونے والے اس قسم کے مختلف محیرالعقول جغرافیائی واقعات اور حالات کی کثیر تعداد کو مدنظر رکھتے ہوئے مقامی افراد جو کہ اب بہت کم تعداد میں رہ گئے ہیں۔ ان کا کہنا ہے کہ موت کی وادی میں آنے والوں کے لئے ضروری ہے کہ وہ اس دادی میں جب داخل ہوں تو اسے اپنا ممکنہ طور پر آخری سفر سمجھیں۔

منقول از ایکسپریس اردو (http://www.express.pk/story/221047/)

گلاب خان
01-26-2014, 08:55 PM
:chase:واو بھت خوب بھت عمدھ دوست

بےباک
01-27-2014, 09:04 AM
سچ میں حیرت انگیز معلومات ہیں ، چلتے پتھروں کےبارے تو علم ہوا تھا ، ایک تحریر پڑھی بھی تھی ، باقی معلومات میرے لئے بالکل نئی ہیں ،
بہت خوب، شاندار سقراط صاحب ،

انجم رشید
01-30-2014, 09:15 AM
بہت خوب زبردست معلومات

فرحان اشرف
02-03-2014, 08:48 PM
بہت خوب جناب