میلہ چار دِناں دا

گرمی دے وچ پِین دا مزہ ای آئوندا بوتل ٹھنڈی دا
وڈے گھر نہ وڈیاں کریں توں رِشتہ ماڑا گنڈی دا

دولت والیاں لوکاں دا تے ست وِیہاں دا ہے جی سو
اوہو جا کے مَلدے کوٹھا اکثر ویکھے رنڈی دا

ویکھن نوں اوہو بھلا لگے بہت ای گلاں کردا اے
پُٹھیاں سِدھیاں اُچیاں کرے جو اوہدے روز نُوں بھنڈی دا

مال حرام دا اودھر جاندا جِتھے حُسن کھلارا اے
ڈاکو سیٹھ وی لاندے پھیرا لوکو ہیرا منڈی دا

ماڑے دے ہتھ پیسہ آوے اوہو ٹوہر تے کڈھ دا اے
ویکھو بابو بن کے پھِردا پایا سوٹ کرنڈی دا

بندہ چور چکاری والا اُس تے نظر وی رکھی دی
اوہ ہتھ کدی جے آ جاوے تے اُس نُوں رَج کے پھنڈی دا

اَگے پِچھے ہور کسے دے ایویں نہ توں پھِریں او یار
جس نے میل فقیرؔ کرایا اُس ناں لنگر ونڈی دا